قصة قصيرة
جلست أمامه ووضعت يدها على وجهه تتحسسه في حب ثم قالت:
"قولِّي يا مراد إيه أكتر حاجة بتحبها فيا؟"..
قبَّل يدها قائلاً:
"بحب كل حاجة فيكي"..
ابتسمت في خجل وقالت:
"فاكر أول مرة تيجي تكلمني فيها؟"..
"ههههه وهو ده يوم يتنسي..يوميها ركبتيلي الوش الخشب ومكنتش عارف أتكلم معاكي واكتشفت بعد كده إنك معجبة بيا إنتي كمان"..
"هههه اومال كنت عايزني أول ماتيجي تقولي إنك معجب بيا أقولك وأنا كمان..كان لازم أدوخك شوية عشان تعرف قيمتي بعد كده"..
نظر لها في حنان قائلاً:
"عارف قيمتك طبعاً يا حبيبتي..إنتي مفيش زيك أبداً"..
ابتسمت فقال لها:
"ندى هتفضلي تحبيني لحد إمتي؟"..
قالت والدموع تملأ عينيها:
"لآخر يوم في عمري"..
"ماما..يللا بقي هنتأخر"..
نظرت لابنتها البالغة عشرة أعوام وتذكرت موعد ذهابها إلي المدرسة..قبَّلت صورته المزينة بالشريط الأسود وأعادتها إلي مكانها علي الحائط وخرجت مع ابنتها تداعبها الذكريات.
رضوى احمد
ليست هناك تعليقات:
إرسال تعليق