الشباك | حماده زيان

بالذمه ما حصلتشى معاك
 فى مره باصص م الشباك
 شايف عجوز معدى هناك
 يا سبحان مسير الأفلاك

قلت فى نفسك من غير زن
 أنا ممكن أوصل نفس السن
 وأبقى عجوز كركوب بيئن
 ولا الموقف ما فرقشى معاك

طب شفت الراجل المتسول
بييجى شارعكم من عام نول
 ولابيتأخر ولا كان بيطول
 يدعى لك تسلم وبيترجاك

صعب عليك
 عايز تديله حاجه ياكلها
تشد حيله
 وفلوس يشترى اللى حالى له
 وندهت لقيته بيستناك

ماسمعتش بياعة المناديل
 أم وش وصوت جميل
 عرفت أن همها تقيل
 وإتعاكست لجئت لحماك

أشتريت منها علشان تساعده
ا وحطيت فلوس بزياده فى أيدها
 فرحت أنك بتحميها وتفيدها
 ولا قلت مش مستواك

طيب وقفت تتصل بقريب
 ودوشك بياع الأنابيب
 صفرت له يلف يجيب أنبوبه
 كانت لزماك

طلع لك كان شاب مؤدب
 بتتفرج وهو بيركب
 وبتسأله وعمال تحسب
قلت أربط صح لنروح فى هلاك

وطلع جارك عبد السلام
 بص لك من غير كلام
قفل الشيش ودخل ينام
 وقولت ياريته كان سهراك

سمعت أخينا بياع الفول
 موواويل وأغانى كان بيقول
 ولادخلت تنام على طول
 لأن الموال مكنشى على هواك

 حماده زيان
أكسجين حروف
مواهب اكسجين حروف